CCB Alti Garde

Die Alti Garde vom CCB stoot für gläbti Fasnachtstradition
und ächti Kameradschaft. Mit Liideschaft, Humor und Herz
bildet sie s’Rückgrat vom Verein.

Die Alti Garde vom CCB hett über 100 Mitgliider. E guete Drittel isch fasnachtsaggtiv und en andere Drittel isch s Johr duure regelmässig oder glägentlig bi unsere Aggtivitäte wie Summerplausch, Herbschtbummel, Johresfyr, Marschiebige usw. drby. E baar vo uns kenne sich sitt über 70 Johr! Grad elteri CCBler, wo sälber nümm Fasnacht mache (also e Däil vo de „Passivmitgliider“), sinn bi uns sehr aggtiv!

Mir pfläge s’ganz Johr d’Kameradschaft, undernämme vyles zämme und mache unseri Larve sälber. Immer drby sinn au unseri VordräblerInnen und e Hampfle „Passivmitgliider“.

Mit guet 15 PfyfferInne und 5 Dambuure iebe mir ab de Summerferie wüchentlig im CCB Käller uff dr Lyss.

Termin vo dr Alte Garde

Datum	Zeit	Beschreibung

15.03.2026

00:00 – 00:00

Bummel

18.04.2026

17:00 – 00:00

Johresfyr Alti Garde

04.06.2026

20:00 – 00:00

Hauptversammlig Alti Garde

18.06.2026

20:15 – 22:00

Kaländer aabelaade

Inträssi bi dr Alte Garde mitzmache?

Möchtsch aggtiv sy und das zmitzt im Cliqueläbe vo dr Alte Garde?
Denn mäld di bi unserem Obmaa.

Aamälde

Gschicht vo dr Alte Garde

Die Alti Garde isch 1964 gründet worde. S Hauptzyyl, nämmlig eltere Fasnächtler e gmietligeri Fasnacht z ermöglige, hett 2005 zur Abspaltig vom „Schwarze Blogg“ gfiehrt. S Comité hett d Regle für die Alte Garde verscheeerft und dr Schwarz Blogg isch do drgege gsi. Im Zeedel 2006 stoht: „Dä fasnachtsobrigkaitlig Spleen het Konsequänze, machts dr Schyn. Die Fitte wänn die Fuule nit – glar, ass es Riiselämpe git.“

Dä personell Oderloss isch hütt längscht überwunde. Allerdings spyyre au mir, dass die eltere Mensche lenger jung blyybe und ainigi Pensionierti bim Stamm „statt bis uns“ Fasnacht mache …